صرخة اصلاح في اذان الاصنام ، يلا نحس بمشاكلنا

بسم الله الرحمن الرحيم

نفسي واحد بس يقولي احنا ليه ساكتين بالشكل ده علي اللي بيحصل في البلد بتاعتنا دي ، ليه اصبحنا زي الاصنام مش بيأثر فينا اي حاجة ذل كل يوم مفيش مشكلة ، كذب وغش من الحكومة ومن المسئولين ولا حد بيتحرك ، طيب يقولوا هنغلي الدعم يا بني ادامين ولا حد بيرد ، ايه يا جدعان هو فيه ايه بالظبط هو انا بس اللي عندي دم ولا ايه ولا الناس اصبحت خلاص مش فارق معاها انها تفضل مذلولة بالشكل ، ولا احنا فعلا اصبحنا اصنام ولا هو فيه ايه بالظبط ، طبعا اكيد في حد هيقولي دلوقتي انتا مالك بس مزعلك نفس ليه يا اخي بالشكل ده ومحسسنا ان الدنيا سوداء ومفيش حاجة حلوة ابدا ،يا دمك يا اخي ، علي فكرة انا كلمت اكتر من واحد من الناس يا عم البلد كده حالها عجابك في ظل الظلم ده والخراب والرشوة والمحسوبية اللي اصبحت في كل شبر وعلانية كده من غير كسوف ولا حياء ، كل ده كوم وكبح جماح الحريات ده كوم تاني ، يقوم الاخ الفاضل البارد ده يرد عليك يا عم الدنيا حلوة والحمد لله بناكل ونشرب وتمام التمام ، يلاهوي هو احنا اصبحنا في الدنيا همنا الاكل والشرب وخلاص ونبقي كده تمام التمام زي ما الاخ ده قال ، لا يا جدعان لا والف لا كمان ده احنا كده انطبق علينا قول الله ( والذين كفروا يتمتعون وياكلون كما تاكل الانعام والنار مثوي لهم ) اعتقد ان كلام الاخ اللي فات ده مطايق للاية بالظبط ، فعلا اصبح كل همنا دلوقتي ان احنا ناكل ونشرب ونلعب مش عايز اقول زي الانعام لان الانعام ليها فائدة كبيرة ، علي الاقل ليها هدف في حياتها ، مش زينا كده عايشة وخلاص ،ومن خلاص فعلا سوالي لا كتر من واحد من الناس يا عم انتا عايش ليه يقولك انا عايش علشان اشتغل واتجوز ويكون عندي بيت واسرة واولاد وزوجة وخلاص ، بس كده يا عم انتا هو انتا عايش علشان كده بس ، واحد تاني يقولك انا عايش علشان استمتع بحياتي اخرج والعب واشوف الدنيا واقضيها زي ما الشباب بيقولوا يااااااااه بس كده يا كابتن انتا عايش علشان كده بس تسمتع وتقضيها بس ، واجوبة كتير سمعتها من ناس كتير وان كانت تدل علي شي فانها تدل علي شي واحد ان احنا فعلا نسينا هو احنا جينا الدنيا دي ليه وهدفنا ايه من الدنيا دي وعلشان فعلا اطنبق علينا قول الله ( نسوا الله فانساهم انفسهم ) فعلا والله احنا فعلا نسينا هدفنا من الدنيا والحياة وعلشان كده ربنا سبحانه وتعالي خلنا نسينا انفسنا ونسينا العالم كله حتي انهم اطلقوا علينا لقب العالم الثالث من خلال التدني والتخلف اللي احنا وصلنا ليه ، وعلشان كده انا هحاول اني افرد بعض المشاكل الموجودة في المجتمع حاليا لعل وعسي حد يحس معايا ان في مشكلة ويحاول انه ينشرها او يحلها معايا لعل الله يساعدنا في حل المشاكل

اولا : طبعا كنت لازم ابدا بالمشكلة الدينية علشان هيا محور الحياة واللي نقدر من خلالها في ايجاد حلول لمشاكلنا ،عندنا مشكلة دينية الاول ولا مش عندنا علشان نتفق مع بعض، انا راي ان احنا عندنا وهقول ليه وانتوا احكموا بنفسكم ، ممكن تجد واحد داخل يصلي وبعد ما خرج من الصلاة سيادته يطلع سيجارة ويدخن !!! غريبة مش كده ( مع اتفاقنا ان السجاير حرام اساسا) او ممكن تلاقي واحد خارج برده من الصلاة وبيبص علي واحدة ماشية في الشارع وهو ليا مخلصش ختم الصلاة !!! غريبة برده ، طيب اسمع الاغرب واحد خارج من الصلاة وبعد ما طلع علي مكتبه ( موظف حكومي ) ، فتح الدرج علشان يكمل شغل وطبعا اكيد لازم الدرج يتملي الاول علشان يقضي المصلحة !!! غريبة دي برده مش كده يا حضرات ، يبقي قي مشكلة يا اما هيا الصلاة تحض ودفع علي ارتكاب الاخطاء او الغلط فينا احنا لا احنا مش عارفين ايه معني الصلاة ، وانا شايف ان الراي التاني ارجح لان ربنا سبحانه وتعالي قال ( ان الصلاة تنهي عن الفحشاء والمنكر ) يبقي الغلط فينا ولا ايه يا حضرات ،طيب دي الصلاة ، ايه تاني(المعاملات ) ممكن تكلم واحد وتقوله يا عم انتا بتراعي ربنا في شغلك وفي تجارتك يقولك الحمد لله ماشييين بما يرضي الله ، طيب تيجي تبص علي اخينا ده بما يرضي الله ازاي تلاقيه يا حبة عيني شغال بالرشوة والسلطة واستعمال النفوذ والفلوس للحصول علي حقوق الغلابة من الناس ولنا في الدقيق الوزاري والتموين خير دليل ولا ايه يا حضرات ، شكلها كده فعلا في مشكلة دينية ، طبعا دي كانت امثلة بسيطة جدا عن الحياة العملية ناهيك بأه عن الوساطة في الوظائف واعمال المقاولات المضروبة والبورصة العظيمة بتاعتنا والدروس الخصوصية وجشع المدرسين وروشتة الدكتور اللي مظبط مع شركة ادوية محترمة علشان يكتب للمريض العلاج المتفق عليه ومش مهم العلاج غالي ولا رخيص المهم انه يكتب العلاج المتفق عليه وطبعا العيان هيدفع هيدفع وهو مش عارف ان في اكتر من بديل رخيص ممكن ينفع بس هيعمل ايه في الدكتور اللي مش عنده دين ده ، ده طبعا باه ناهيك عن العلاقات لحرام الموجودة نفي كل حتة بداية بالمدارس الاعدادية لحد الجامعات وامكان العمل وبين الموظفين والموظفات والمدرسين والتلميذات وبين الاصحاب واخوات اصحابهم ومش عايز اقول بين الخطابين والممراسات الخاطئة اللي تتم تحت مسمي الحب والارتباط وتبادل المشاعر عبر البولوتوث ،اقول ايه ولا ايه ولا ايه ، والله اللي انا قولته ده كله انما هو جزء صغير جدا من الحقيقة وبعد كده واحد يقولك لا مش عندنا الحمد لله مشاكل والدنيا تمام التمام ومش معني ان عندنا كل المشاكل دي ان احنا مش هنعرف نحلها لا والله هنقدر وفي زمن قياسي بس الاول نحس ان احنا عندنا مشكلة وبالاخص في الحلقة دي مشكلة دينية يا ريت اسمع حد يعارضني قبل ما اسمع حد يوافقني في الراي تمني ان يشاركني في الاصلاح لاني بحلم بالاصلاح واتمني اني اكون من المصلحين

اعتذار واجب ،وتهنئة بسطية ، مناسبة سعيدة جدا اصبحت تاريخ مهم في حياتي ،ورسالة خاصة جدا

بسم لله الرحمن الرحيم

اولا:ااحب اني اعتذر ليكم علشان انا غيرت الموضوع اللي كنت هتكلم فيه وهو ( الصدقة الجارية ) اللي كنت وعدتكم اني اتكلم فيه في التدونية اللي فاتت ... بس معلش غصب عني علشان في موضوع اهم لازم اتكلم ، وعلي وعده ان شاء الله ان احنا نناقش موضوع الصدقة الجارية ده ان شاء الله

ثانيا:ااهداء بسيط احب اهديه لعمر ابن خالتي علي المدونة بتتاعه ،معي اني عارف انو هيستخدمها في تخريب النت ويزهق الناس ويخليهم يبطلوا يدخلوا علي النت خالص، بس مش مهم المهم انو خد خطوة في طريق الكتابة وده كويس اوي احنا كنا فين ، انا عارف انو اكيد لما يقرا الكلام ده اكيد هيشتمني بس مهم برده ، المهم اني قولت اللي نفسي ، واحب اقوله برده جزاكم الله خير علي مشاعرك الرقيقة في الخطوبة بتاعتي وعقبالك ان شاء الله ... حاكم انا عارف انو هيموت ويتجوز ، يلا عقبالكم جميعا

ثالثا:وده باه المهم ، الحمد لله امبارح كانت الخطوبة بتاعتي ولا اقولك كانت الفتحة بتاعتي ، والله انا مش مصدق اني خلاص باه كبرت وهتجوز ومسئولية باه وكده ، بس والله مسئولية لذيذة اوي خصوصا لو الناس اللي انتا هتناسبهم ،زي الناس اللي انا ناسبتهم ، والله انا بحمد ربنا كتير اوي انو وفقني مع بيت طيب زي اللي انا ناسبته وخصوصا اني حاسس اني مش غريب عليهم ، وهما ربنا يبارك فيهم كلهم مش محسسني بفرق خالص ، ادعو ليا ربنا يتمم علي خير ، علشان انا مستريح نفسيا اوي للارتباط ده ، ( امين ) ، وطبعا علشان اكون صادق مع نفسي قولت انا لازم اقول انا عايز ايه من الانسانة اللي انا هرتبط بيها من الاول ،علشان اكون صادق معاها ومع نفسي ، وهحاول اني

اكتب الحاجات دي بشكل بسيط ونبدأ واحدة واحدة ان شاء الله

१- انها تكون صديقة ليا احكي ليها عن اي حاجة مزعلاني او اي حاجة في حياتي وتشاركني الراي في اي حاجة من

امور الدنيا ، بجانب انها تكون زميلة من خلال انها تسمع مني مشاكل شغلي والعملاء واي حاجة خاصة بالشغل ،كمان تكونوجة وكاتمة سري وتحافظ عليا زي ما انا ان شاء الله هحافظ عليها

२- انها تكون دائما مهتمة اوي بالشقة بتاعتها ، لاني بحب ديما تكون شقتي مرتبة ونظيفة وجميلة ،وده علشان

خلي شقتنا المكان اللي بلاقي فيه نفسي وتكون شقتي دي هيا جنتي والمكان اللي بستريح فيه ، مش نعمل زي الناس اللي تنزل تقعد علي قهوة ولا كافيه ،بس هما ليهم العذر برده علشان مش لاقيين اللي هما عايزينه في منازلهم ، وانا مش بحب اكون كده

३- انها دائما تكون مهتمة بنفسها ،وتجعل من نفسها الانسانة الوحيدة في عنينا ،حتي بعد ما يكون في اولاد ،لان كل حاجة ليها حق ، مش مجرد ما الاود يشرفوا ،خلاص باه اركب انا المترو ، وراحت عليا

४- بحب كمان لما اكون راجع من الشغل ،انها تكون في انتظاري بابتسامة رقيقة ونظرة شوق ولهفة لعودتي

ان دائما تكون مشاكلنا بينا احنا الاثنين بس ، ومحدش يعرف بيها مهما يكون قريب الا لما نكون احنا الاثنين متفقين علي ده

४- في كمان حاجة مهمة اوي اني عايزها تكون دائما مشاركة ليا في كل حاجة ،علشان انا مش من انصار الراي الواحد العقيم ده لا طبعا لازم تكون معايا في اي قرار خاص بينا احناالاثنين

انا عندي مشكلة اني انا شخصية هوائية وسريعة التاثر بالاخرين ،فلازم تاخد بالها من ده كويس ولو شافت فيا اي سلوك جديد مش متوافق مع حياتنا تنبهني ليه بسرعة ونعالجه مع بعضنا ، لانها هتكون اقرب حد مني فتشوف ايه الحاجة الكويسة او ايه الحاجات الوحشة وتقولي عليها لانها هيا مرءاتي انا في الحياة

५- في بعض الاحيان بكون راجع من الشغل اعصابي مشدودة ومتنرفز ، فاتمني منها في اللحظة دي انها تمتصني وتحاول انها تحتوي هذا الغضب او العصبية دي لحد ما اهدي ، وبعد كده تعمل اللي هيا تحبه فيا بس بعد ما اكون هديت خالص ، علشان انا عارف نفسي لما بكون متوتر مش بحب حد يقعد يزود عليا الضغط من خلال انو هو كمان يتعصب عليا ، او انو مش يستحملني وانا اتمني من الله ان ابطل العصبية دي ان شاء الله

اعتقد ان الحاجات اللي كتبتها دي وخصوصا اللي معلم عليها بالاصفر دي هيا اهم حاجات في حياتي او تقدر تقول انها اهم الامنيات اللي انا اتمني انها تكون موجودة في حياتي الزوجية ان شاء الله ، ومش عايز اقول ان الحاجات دي بالنسبة ليا خط احمر علشان اللي بيحب حد مش بيعمل معاه خطوط حمراء ولا خطوط نفط حتي ، اللي بيحب حد بيضحي علشانه ويبقي نفسه يعمل اي حاجة في سبيل ارضاء الطرف الاخر حتي لو كان بيعمل حاجة مش بيحبها ،بس المهم انو بيعملها علشان يرضي الطرف الاخر ،ويحقق ليه اللي يرضيه ، وانا واحد من الناس دي بمجرد اني اشوف اللي قدامي سعيد والابتسامة في وجه بنسي والله اي تعب ادركني من خلال العمل ده ، تخيل ان ده بيحصل مني مع اي حد فما بالك لو كان الامر ده بيني وبين زوجتي اعتقد الموضوع هيكون تضحية مني لابعد الحدود ، وبدون انتظار مقابل ان شاء الله ، بس انا حبيت اقول الكلام ده علشان انا بتمني من الله ان حياتي الزوجية تكون صورة مميزة للحياة بين الزوجين ، مش مجرد حياة زوجية مملة زي اللي بنشوفها في التفلزيون ، يدوب الراجل يصحي الصبح يروح ويجي يتغدي وينام ولو عندو فترة تانية يمشي علي الشغل ويجي ينام زي الخروف ولا في حوار بينه وبين مراته ولا الاولاد وحاجة مملة اوي ، انا مش عايز اكون كده خالص ، علشان كده انا كتبت الكلام ده علشان ده هو اللي بتمني انو يحصل ، ولو حصل ان شاء الله هتكون حياتي الزوجية حياة مميزة جدا ،ومش معني اني كتبت الكلام ده انو مش موجود في الانسانة اللي انا اتشرفت بنسبها وبالارتباط بيها ، لاطبعا موجود ان شاء الله ( احسن اخد مخالفة ) بس الفكرة اني بحاول الفت الانتباه اللي الاشياء االلي بحبها ، وانا كده بقولها اتفضلي المفاتيح بتاعت شخصيتي معاكي كلها ، فحاولي تحافظي عليها ، وبلاش تفرطي في اي مفتاح منهم ولا تدي فرصة لاي واحدة انها تلاقي مفتاح منهم وتوصل منها لشخصية زوجك ।

تقريبا انا كده خلصت كل اللي كنت عايز اقوله عن حياتي الزوجية المستقبلية ورسمت صورة كاملة عن امنياتي في حياتي الزوجية اللي بحلم بيها وحابب انها تكون علاقة زوجية متميزة ومتجددة ومتطورة ومبنيه علي الصداقة الزوجية الطاهرة ، طيب في باه سوال مهم ، لو كده كله توفر بفضل الله منها ، ايه باه العائد عليها ؟

والاجابة بسيطة اوي انها اذا عملت الحاجات دي فهي كده اصبحت تمتلكني كلينا وتقدر تأمر باي شي وانا مش هتاخر عنها ان شاء الله وربنا ان شاء الله يجعلني زوج صالح لها واقدر اني اصون النعمة العظيمة اللي ربنا من عليها بيها وهي خطيبتي

معلش انا يمكن طولت اول المرة دي في الكتابة بس معلش الموضوع المرة دي مخلتف شوية ومهم اوي اوي ، بالنسبة ليا مع اني والله الحمد لله سعيد اوي بالخطوبة دي بس قولت لازم اوضح الامور من الاول علشان اكون صادق مع نفسي ومعاها ، مستني ان شاء لله ارائكم وتعقلياتكم المزعجة ( قصدي المميزة

مداوي الجروح

طب وانا اتجوز ليه؟؟ مهو انا كده كويس من غير مسئولية ولا التزامات ... لحظة تغير في حياتي

بسم الله الرحمن الرحيم

زي ما قولت لكم انا مش بعرف اتكلم عن السياسية ولا اي كلام من الكبير ده زي المدونين الكبار اللي انا اتصدمت بالكلام اللي مكتوب علي المدونات بتاعتهم ... ومن غير رغي كتير هدخل في الموضوع اللي كان شاغلني من فترة ... الموضوع ببساطة انا الحمد لله كنت خلصت الكلية بتاعتي وكمان الحمد نفدت بجلدي من الجيش والحمد لله كمان اشتغلت في مكتب المحاسبة بتاعنا ... مش كده وبس ده كمان الحمد لله شقتي جاهزة ... ومش كده وبس لا ده كمان والداي كان واعدني انو هو اللي هتحمل تكاليف جوازي كاملة ...(بس طبعا انا اكيد هشارك بجزء كبيررررررر) ومع ذلك كله انا مش راضي اتجوز ... تتفكروا ليه يا حضرات ، والله انا قعدت اسال نفسي ؟؟؟ طيب انا ليه مش عايز اتجوز مع كل الظروف المشجعة علي الجواز دي ... قعدت طبعا اختلق معوقات كتيرررر اوي اني مش فاضي مثلا ( علي اساس ان الوزارة هتقع لو انا اتجوزت ) وشوية مش لاقي حد يناسبني ، وشوية اصلي حران ومش بحب حد يقعد جنبي لزق كده ،، اي كلام ... بس الصراحة فين باه هقولكم عليها وامري لله ... اني مش عايز يكون عليا مسئولية خالص يعني اصحي براحتي وانام براحتي خارج وداخل براحتي ،معايا فلوس لنفسي ،مش معايا مش مشكلة بتصرف .... بس المهم مفيش حد ملزووووم مني ... وبعدين مهو انا كويس كده مش غير جواز ...( طبعا هتفهومني غلط ) مش قصدي اللي بتفكروا فيه ،لشان انا الحمد لله عارف ربنا ومش ناوي اعصي الله سبحانه و تعالي ... بس يعني اهو كلمة من واحدة مثلا معاك في الشغل تقولك انت محترم اوي ،،، ولو حظك كويس حد يركب جنبك في المواصلات من زمايل المدرسة ( البنات طبعا ) ،،، فتقولك انت شيك اوي النهاردة ، (علي اساس مثلا اني مشهور اوي والحقيقة عكس كده خالص ، بس هو الشيطان اللي بييعمل التهيوئات دي علشان يضحك عليك يا هاري يا خويا ) المهم اهو كلمة من دي ونظرة من دي ابتسامة اعجاب بشكلك ولبسك ومظهرك من دي ،،،(حركات شيطان ومفيش حاجة مني اللي فات ده كانت بتحصل)... بس انا كل ده والله ما كان فارق معايا بس اللي فعلا كان مخوفني من الجواز هيا المسئولية وبصورة ادق ،،، المسئولية المادية خصوصا في ظل ظروف الحياة الراهنة ... بس كل اللي اللي فات ده اتغير في لحظة ... عارفين ايه هيا اللحظة دي ... ( لحظة موت الله يرحمه اخويا علاء عصام ) علي فكرة ممكن اي حد يكون اتكلم عن علاء كويس ... وممكن حد تاني يكون عارف علاء من موقف او مواقف ... بس كل ده كوم واللي انا اعرفه عن علاء كوم تاني خصوصا اني انا وهو الله يرحمه وكمان 5 من اصاحبنا ... كانا متربين مع بعض من الحضانة لحد الجامعة ... خصوصا كمان ان الله يرحمه ،كان جيران اوووي ... نرجع لموضوعنا ..... كل اللي فات ده اتغير في اللحظة اللي كنت واقف عن قبر علاء واحنا بندفنه ... قولت اانا لازم اعمل حاجة تفضل تديييني ثواب حتي بعد ما اموت وادخل القبر مع علاء اخويا الله يرحمه ...فكرت كتير اوي اعمل ثلاجة مية مثلا ...( طب مهي ممكن تبوظ في اي وقت ، وبالسلامة علي كده ) ... لا لا لا انا اجيب مصاحف واحطها في المسجد ( طب مهي ممكن تتقطع ، وبالسلامة علي كده ) .... بس الحمد لله لقتها ... انا هتجوز واربي اولادي تربية اسلامية صحيحة علشان الاولاد دول يطلعوا ناس بيعملو ا لدين الله ويربوا اولادهم علي كده وافضل انا احصل الثواب ليوم القيامة ... وعلشان كده انا ماشي دلوقتي في مشروع خطوبة وربنا يوفقني ان شاء الله ... في سوال باه مهم اوي ؟؟؟ طيب لما انتا عايز تربي اولادك علي كده مهو انتا عايز ام تكون متربية علي كده ، عشان تعرف تربي اولادك علي كده ،، طيب اختارها ازاي ؟؟؟ طيب هو ممكن البنت المتربية تربية عادية تتغير وتربي اولادها علي التربية الاسلامية الصحيحة ؟؟؟ طب هو لازم يعني تكون هيا متربية تربية اسلامية علشان اولادها يطلعوا كده ...كل الاسئلة دي ان شاء الله هجاوب عليها في التدونية الجاية ان شاء الله ... في الاخر بس احب اقولكم اكيد كل واحد فينا ربنا بيبعتله رسالة كده علشان يصحي ويفوق ... ووممكن الرسالة دي تكون قاسيية اوي زي اللي حصل معايا ... فياريت نخلي بالنا من اعملنا،لان ممكن في اي وقت يقضي فينا الاجل ... وموضوع الصدقة ده اتمني مشاركتم فيه بافكار جديدة، وان شاء الله هكتب في الموضوع جه تحت عنوان ( انا ميت بس احسن من اللي لسا عايش ) ... وكمان اتمني للناوي يتجوز وخايف من الموضوعات المادية دي افكره بحديث الرسول ( ص) ((((( ثلاثة حق علي الله ان يعينهم .... منهم النكاح يطلب العفاف ...) شوف باه لما الله سبحانه وتعالي يقول حق عليه ان يعينه ... يعني ربنا بيقولك الموضوع المادي ده عليا انا ، والله وناس كتير جربت ده وربنا رزقها من وسع فتوكل يا اخي علي الله وما تقلقش ... اتمني يكون الموضوع عجبكم ... ومستني مشاركتم

افتتاح مدونة مدواي الجروح ... لكل زعلان ومضايق ومجروح ،انا هنا علشانك وتحت امرك وهحاول انور لك الطريق

بسم الله الرحمن الرحيم

كنت طول عمري لما بكون متضايق بقعد علي سطح البيت بتعانا واقعد احكي للنجوم والسماء ايه اللي بيضايقني ، وبعدين سالت نفسي هو انا ليه مش عندي صديق احكي ليه علي مشاكلي ؟ قولت مش معقولة يعني مفيش حد من اصحابي ينفع يكون سري عنده واحكي معاه واقوله عن ايه اللي مضايقني ... فجربت احكي لواحد من اصحابي عن مشكلة كده كان عندي ، وطبعا هو مشكورا سمع مشكلتي كويس اوي بس لما حاول يحل المشكلة حلها من وجهة نظره هو ونسي ان الحل اللي ينفع مع شخصيته اكيد مش هيتناسب معايا انا لان كل واحد ليه خصائص غير التاني .. ومن ساعتها قررت اني مش هحكي لاي حد عن مشكلتي الا اذا تاكدت انو يعرفني كويس اوي ويعرف اني حاسس جدا ومش ممكن اجرح حد بكلمة ولا نظره ولا موقف ... قولت ياتري مين اللي ممكن يكون عارف عني كل حاجة وعارف ازاي بفكر ،ويقدر احاسيسي ... دورت كتير اوي علي حد ممكن يكون ابحر في شخصيتي للعمق ده ... (ملقتش حد).... بس انا نسيت حاجة مهمة اوي وهي اني في اله بيحبني اووووووي ومستني اني احكي له عن اللي بيضايقني واتوكل عليه هو في انو يلهمني الحل ... والحمد لله انا من ساعتة ما جربت الموضوع ده اني اقعد اشكي لربنا عن اي حاجة تضايقني او اي موضوع خايف منه ...من ساعتة ما عملت كده والله مفيش مرة لجت فيها لله وطلبت منه حاجة الا حققها ليا ... يااااااااه الحمد لله علي هذه النعمة ... ومن هذا المنطلق حبيت اني اعمل المدونة دي علشان لو في حد متضايق او زعلان من اي موضوع انا هحاول بكل قوتي اساعده واعرفه الطريق ونقدر سوا نحل اي مشكلة ... ده كان هدفي من المدونة واتمني اني اكون عند حسن ظنكم جميعا .... HP